نعتِ پاک
(طاہر انجم صدیقی)
"نعت میں بھی کبھی لکھوں ایسی"
جس میں الفت بھری ہو "جامی"سی
شاہِ بطحاﷺ کی شان یوں لکھّوں
جیسی حسّان ابن ثابتؓ نے
نعت لکھّی ہے، میں لکھوں ویسی
میرے اشعار سے مدینے کی
ترجمانی ہو اور عکّاسی
جھومتا جاؤں میں مدینے کو
لاکھ پیچھے پڑی ہو ابلیسی
عشق طیبہ کا بانٹنے لگ جاؤں
پاس میرے رہے یہ ایجنسی
میں بھٹک ہی سکوں نہ طیبہ سے
اتنی مضبوط تھامے ہوں رسّی
ہر کسی کو سناؤں میں نعتیں
پھر وہ عبّاسی ہو یا مدراسی
میں تو سنّت پہ ہوں عمل پیرا
وجہ تم ڈھونڈتے ہو سائنسی
اور کچھ ہو عطا قلم میرے
نعتِ خیرالوری'ﷺ میں کنجوسی؟
ذکرِ شاہِ اممﷺ کو دوں ترجیح
جب بناؤں ادب کی پالیسی
جس کی ٹھنڈی ہوا کے آپﷺ گواہ
میں اسی ہند کا ہوا باسی
نعت کا رنگ دیکھ کر طاہرؔ
کرنے لگتے ہیں لوگ جاسوسی
