اٹھائیس کا چاند(طنزومزاح)

چھپانا ہی ہوتا تو کیلنڈر سے چھ دسمبر چھپا لیتا. بلیک ڈے کے ساتھ مسلمانوں کے ماتھے کا کلنک مٹ جاتا."

 طنزومزاح

اٹھائیس کا چاند 

(طاہر انجم صدیقی)

         پُنّے میاں اپنی زبان کی چرخی میں الجھ کر رہ گئے. وہ یاروں میں یہ بھول گئے تھے کہ دوست اچھائی سے زیادہ برائیاں جانتے ہیں. 

         اس روز بھی ان کی زبان کی  قینچی چل رہی تھی. 

         "اپُن نے بھی جوانی میں خوب روزہ رکھا ہے. ایک روزہ نہیں چھوٹتا تھا اپُن کا. بلکہ کئی مرتبہ تو بغیر سحری کے بھی روزہ رکھا ہے اور وہ بھی ایسا کہ.........."

         شفیق نے اُن کی بات اچک لی. 

         "کیا کہا؟ روزہ اور تم؟......... پنّے میاں ذرا آدمی دیکھ کر چھوڑا کرو یار.......ہم دونوں کا سارا رمضان تو باپردہ ہوٹلوں میں کھاتے گزرتا ہے........تمہارے لیے ایک وقت کا کھانا چھوڑنا تو مشکل ہے بڑے آئے بغیر سحری کا روزہ رکھنے والے......... اِدھر دیکھو! یار خان کو! جب روزہ نہیں رکھ پاتا نا تو تمہاری طرح لمبی لمبی چھوڑتا بھی نہیں ہوں. بتاؤں کیا تمہارے روزے کی داستانِ شکم رُبا؟"       

         پُنّے میاں تھوڑا سا جھینپ گیے.....اور منانے والے انداز میں بولے.

          "ارے نہیں یار شفیق! تم تو برا مان گیے. جانے دو."

          "نہیں...... میں تو بتاؤں گا......!"

شفیق نے کمر کس لی. پّنّے میاں کی لنگوٹی کھُل گئی. 

          شفیق نے اکرم، عمران، ریاض اور سلطان کو مخاطب کیا. وہ چاروں سننے کے لئے خم ٹھونک کر میدان میں اتر آئے لیکن پُنّے میاں ہتھے سے اکھڑ گئے. تن کر کھڑے ہو گیے.

          "تم کھڑے رہو یا چلے جاؤ میں تو بتاؤں گا...... سنو بھائی لوگ! داستانِ غیرسحراں! ....... جب یہ روزہ تھے نا...... تو صرف گھر والوں کے لیے تھے !...... صبح گیارہ بجتے ہی ان کا بارہ بج چکا تھا. آدھمکے دربارِ جہانگیری میں.......لگے زنجیر ہلانے....."

" مگر یار شفیق زنجیر تو انصاف مانگنے کے لیے ہلائی جاتی ہے نا؟ "

" ہاں! پُنّے میاں! انصاف ہی تو مانگنے آئے تھے. پیٹ کے چوہوں کے ساتھ انصاف. ان سے خیریت دریافت کی تو مُسمُسی صورت بنا کر کہنے لگے. 

"یار شفیق! پیٹ میں چوہے دوڑ رہے ہیں. تمہاری بھابھی نے سحری لے لیے زبردستی اٹھا دیا تھا. آج "سَم قدر ( شبِ قدر) ہے. بڑا روزہ ہے نا!......مگر یار شفیق! ابھی تو سارا دن پڑا ہے اور ایسا محسوس ہورہا ہے کہ اپُن نے دو دن سے کچھ کھایا پیا نہیں ہے. یہ دھوپ تو چٹکا یوں ماررہی ہے جیسے بھری دوپہر ہو....... گلا سوکھ کر کانٹا ہو رہا ہے....... رحم کرو یار....... کچھ کھِلا پلا دو مجھ........"

          "ایسا؟ ایسا کب بولا تھا؟"

          پُنّے میاں نے شفیق کی بات کاٹ دی. شفیق تنک گیا. 

           "پُنّے میاں! تم تو ایسے گھگیا رہے تھے کہ بس "اللہ کے نام پہ کھلا دو باوا" بولنا ہی رہ گیا تھا اور ابھی پوچھ رہے ہو کہ ایسا کب بولا تھا؟"

            " جاؤ! یار میں تم سے بات نہیں کرتا."

            پُنّے میاں پھول گئے.

            "اور ہاں بھائی لوگ! ان کا ماہرِ فلکیات والا قصہ بھی سناتا ہوں؟"        

            " کیوں نہیں؟"

            " ضرور سناؤ."          

             یکے بعد دیگرے سبھی تائیداً بول پڑے اور شفیق نے بولنے کے لیے ایک لمبی سانس کھینچی. پُنّے میاں کی بولتی بند ہوگئی. ان کا منہ کچھ کہنے کے لیے کُھلا کا کُھلا رہ گیا. وہ جانتے تھے کہ اب گڑا مردہ اُکھڑ کر ہی دم لے گا. 

             شفیق نے اپنی ٹوپی درست کی اور  پُنّے میاں کی طرف دیکھ کر مسکراتے ہوئے کہنے لگے.

             "یقین جانو کہ  پُنّے میاں نے سارا رمضان کچھ کھایا ہو یا نہ کھایا ہو مگر میرا کان ضرور کھاتے رہے ہیں. کیوں میاں بتاؤں یا نہیں؟" 

             "تم اور نہیں بتاؤ گے؟ ہو ہی نہیں سکتا. تم میں اور عورتوں میں سرِ مو فرق نہیں ہے. جب تک ستّر گھر جاکر گا نہ لو تم کو چین کہاں؟"

      پُنّے میاں نے عورتوں کی طرح ہاتھ نچا کر ذرا سے مردانہ لہجے میں کہا تو شفیق مسکرا کر کہنے لگا. 

            "پُنّے میاں! تم کو لگتا ہے اس طرح میں رک جاؤں گا.......بھول رہے ہو میاں کہ میرا نام شفیق ضرور ہے.....لیکن ایسے معاملات میں قطعی شفقت نہیں کرتا.......ہاں تو دوستو! میں کہہ رہا تھا کہ یہ پُنّے میاں سارا رمضان میرا کان کھاتے رہے ہیں. پوچھو کیسے؟"

           " کیسے بھئی" 

           " کیسے؟" 

           "کیسے؟" 

            سارے دوست کورس بن گئے. 

         " کیوں پُنّے میاں! کیسے کان کھاتے رہے ان کا؟"

    ریاض نے  پُنّے سے ہی پوچھ لیا اور گیند  پُنّے میاں کے پالے میں ڈال دی.

          " مجھ سے کیا پوچھتے ہو؟ یہ بی بی سی لندن ہے نا. ان ہی سے پوچھو...... ان کا ہی پیٹ پھولا ہوا ہے. جب تک بَکیں گے نہیں نارمل ڈیلیوری نہیں ہونے والی."

          "ہاں بھیّا! ہم تو بکیں گے.......اور تم اپنی وہ بک بک بھول گئے جو سارا رمضان کرتے رہے...... سنو دوستو! یہ اپنے جو  پُنّے میاں ہیں نا...... رمضان کا چاند نظر آتے ہی بھاگے بھاگے میرے پاس آئے. حالانکہ یہ اس روز اوندھے منہ گر گئے تھے اور خود ان کے ماتھے پر بڑا سا گومڑ چاند بن کر چمکنے لگا تھا لیکن خدا جانے انہوں نے چاند کو کب اور کہاں دیکھ لیا. تب سے برابر مجھ سے رابطے میں تھے.

          اس روز کا چاند ٹھیک طرح سے غروب بھی نہیں ہوا ہو گا کہ یہ میرے گھر طلوع ہوگئے. لگے دور ہی سے آوازیں دینے. 

          "شفیق میاں! او شفیق میاں!" 

          میں نے سوچا کہ کیا افتاد آپڑی ہے پُنّے میاں پر جو اس طرح چیخ پکار کررہے ہیں. میں سرعت سے باہر نکلا تو یہ میاں سرگوشی کرنے لگے. 

           "معلوم ہے شفیق میاں کہ آج رمضان کا جو چاند دکھائی دیا ہے نا وہ انتیس کا چاند تھا."

          "مگر یار پُنّے! ہم نے تو ابھی ابھی تیس کا چاند دیکھا ہے نا؟" 

           میں نے وضاحت کی تو یہ فوراً رازدارانہ انداز سے کہنے لگے." 

           "کسی سے بتانا مت کہ ہم نے جو ابھی دیکھا ہے یہ کل کا چاند ہے." 

میری سمجھ میں کچھ نہیں آیا. سر کھجا کر پوچھ بیٹھا. 

"کل کا چاند؟" 

ہاں! بھئی! یہ کل ہی کا چاند ہے. ہمارا ایک روزہ چھوٹ چکا ہے."

           اس بات پر تو میں اپنے پُنّے میاں کا گومڑ والا چاند دیکھتا رہ گیا جو ان کے ماتھے پر پوری تابناکی کے ساتھ موجود تھا اور سونے پر سہاگہ یہ کہ ہمارے طرم خان مزید کہنے لگے. 

          " ایسے حالات میں جب شک ہو کہ چاند ہو چکا ہے مگر یقین نہ ہو تو اس سے اگلے دن کو"یوم الشک" یعنی شک کا دن کہتے ہیں. اس روز روزہ رکھنا منع کیا گیا ہے."

          اب بھیّا میں تو پریشان ہوگیا. یہ "یوم الشک" کیا کیا بَلا ہے؟ میرے پاس پُنُے میاں پر شک کرلینے کے علاوہ دوسرا کوئی راستہ نہیں بچا. میں نے سوچا کہ یہ ضرور دو والی دے رہے ہیں. اس سے پہلے میں نے"یوم الشک" کبھی نہیں سنا تھا. بعد میں مسجد کے امام صاحب سے پوچھا اور پُنّے میاں کی صداقت کا اعتراف کیا تو پھر پُنّے میاں روز روز آدھمکنا شروع ہو گئے. روز یہی بات، روز یہی موضوع اور پھر اس میں یہ بات کہ آج سعودی میں اِتنا روزہ ہوا، آج اِتنا ہوا اور تو اور یہ ہمارے پڑوسی ملک کے بارے میں بتا بتا کر سارا رمضان ڈراتے رہے ہیں."

          "ڈراتے رہے سے کیا مطلب؟"

         "اس میں ڈرنے کی کیا بات؟"

         "کہیں تم یہ تو نہیں سمجھ بیٹھے تھے کہ رمضان شروع ہوتے ہی شیطان کے ساتھ تم کو بھی بند کردیا جائے گا؟"

           " نہیں یار! یہ آ آ کر بتاتے تھے کہ ہمارے پڑوسی ملک میں روزہ ہم سے ایک دن آگے چل رہا ہے. سعودی کے برابر چل رہا ہے....... اور ہاں آخر آخر میں تو سعودی کی دھمکیاں جاری کردی تھیں پُنّے میاں نے."

           " وہ کیسے بھئی؟......"

"سعودی کب سے بہادر ہوگئے کہ ان کے نام کی دھمکیاں دی جائیں؟......"

"جس دن سعودی بہادر ہوگئے نا اس دن سے مسلم ممالک کی تاریخ کا سنہرا باب شروع ہوجائے گا."

           "چھوڑا یا سعودی کو ہمیں تو پنّے میاں کی دھمکیاں سناؤ!" 

           سلطان نے کہا اور سبھوں نے کمر کس لی. 

           شفیق نے مزید چہک کر کہنا شروع کیا اور پنّے میاں دھم سے زمین پر آ بیٹھے.

             "یہ جس دن بڑے روزے سے تھے نا...... اس دن تو غضب ڈھایا تھا......میں گیارہ بجے سے ان کے ساتھ کھانے کے چکّر میں گھن چکّر بنا رہا. اِدھر اُدھر مارا مارا پھرتا رہا اور یہ مسلسل مجھ کو پکاتے رہے. بار بار چاند کا تذکرہ...... بار بار سعودی کا ذکر...... بار بار پڑوسی ملک کا ذکر.......اور پھر یہ کہ اب کی بار سعودی والے ہمارے ساتھ عید منائیں گے. ہمارے یہاں جس دن عید ہوگی سعودی عرب میں بھی اسی دن عید ہوگی. مجھ کو لگا کہ چاند کے چکّر میں پُنّے میاں چکور ہوگئے ہیں."

            " ایسا!" ریاض نے درمیان میں کہا

           " کیا بات کرتے ہو؟" اکرم نے سوال کیا اور شفیق نے اپنی بات جاری رکھی.

          "وہ سب چھوڑو! غضب تو یہ ہوا کہ اٹھائیسویں روزے کو آدھمکے پنّے میاں......بڑے رازدارانہ انداز سے کہنے لگے. 

          "میاں شفیق! کسی کو بتانا مت! آج اٹھائیسویں تاریخ ہے."

          "اب بھلا اٹھائیس تاریخ میں چھپانے والی ایسی کون سی بات تھی؟ چھپانا ہی ہوتا تو کیلنڈر سے چھ دسمبر چھپا لیتا.......بلیک ڈے کے ساتھ ساتھ مسلمانوں کے ماتھے کا کلنک مٹ جاتا."

          "شفیق میاں! تم بہت جلدی سنجیدہ ہوجاتے ہو یار! میرے کہنے کا مطلب یہ تھا کہ ہم کو آج اٹھائیس تاریخ ہونے کے باوجود بھی چاند دیکھنا ہے."

          "میاں پنّے! کچھ خوف کیا کرو یار اللہ کا...... اب بھلا اٹھائیس کا چاند کہاں سے لاؤ گے؟ پہلے ہی کیسی کیسی بدعات رائج ہیں. اب تم اٹھائیس والی بھی ایجاد کرو گے؟" 

         "نہیں یار! تم سمجھو تو سہی! میں کہہ رہا ہوں کہ رمضان کا ہمارا پہلا روزہ چھوٹ چکا ہے تم دھیان ہی نہیں دے رہے ہو....... تو اس حساب سے آج انتیسواں روزہ ہے نا؟...... اٹھائیس کا چاند کیسے ہوگا بھلا؟ انتیس کا چاند دیکھیں گے نا ہم لوگ!......... "

         پُنّے میاں فیثاغورث بن گئے. مجھے پُنّے میاں کا حساب کچھ سمجھ میں آیا کچھ نہیں. میں اُن سے الجھ گیا. 

         " پُنّے میاں! اگر لوگوں نے ہم کو اٹھائیس کا چاند دیکھتے ہوئے پکڑ لیا تو ہمارا ایسا مذاق بنے گا نا کہ چاند تو دور کی بات ہے سورج دیکھنا بھی بھول جائیں گے ہم دونوں. "

         "ارے یار شفیق تم تو ایسے کہہ رہے ہو جیسے ہم چاند کے بہانے چاندنیوں کو تاڑیں گے......."

          پُنّے میاں نے ایک آنکھ دبا کر کہا. 

         "پُنّے! اب ہم صرف تاڑنے ہی کے تو رہ گئے ہیں.......مگر ایک بات کا دھیان رکھنا کہ اگر قدرت نے ہم کو تاڑ لیا نا تو بڑے خسارے میں رہیں گے."

          "ابے مولانا! منہ میں دانت نہیں پیٹ میں آنت نہیں اب کیا کریں گے تاڑ توڑ کے..... چلو اٹھو! چاند دیکھتے ہیں!"

          پُنّے میاں نے میرا ہاتھ پکڑ کر اٹھادیا. 

         میں اٹھ کر پُنّے کے ساتھ چلا. ساتھ کیا خاک چل رہا تھا؟ ایسا لگتا تھا کہ پُنّے میاں کو پر لگ گئے ہیں اور وہ مجھے کھینچتے ہوئے لیے چلے جارہے ہیں. میں نے بمشکل ان سے ہاتھ چھُڑایا. میرے لیے یہ سمجھنا مشکل تھا کہ وہ چل رہے ہیں، دوڑ رہے ہیں یا اُڑ رہے ہیں. تینوں کا ملغوبہ بنے پُنّے میاں نظروں سے اوجھل ہوگئے. 

         اللہ اللہ کرکے میں مسجد والے چوک میں پہنچا تو پُنّے میاں کی بجائے پندرہ بیس لوگ گھیرا بنائے کھڑے نظر آئے. 

          میں دوڑ کر قریب پہنچا تو کسی کو گڑھے سے باہر نکالا جارہا تھا. پائپ لائن کی درستی کے لیے کھودے گئے اُس گڑھے میں اچھا خاصا گدلا گدلا پانی بھرا ہوا تھا. باہر نکالے جانے والے کو غور سے دیکھا تو بیساختہ ہنس پڑا. کوئی اور نہیں بلکہ ہمارے پُنے میاں نائک کے انیل کپور کی طرح ایک دن کا سی ایم بن گڑھے سے برآمد ہو رہے تھے. 

         میں نے ادھر اُدھر دیکھا اور پوچھ بیٹھا. 

         "یہ کیسے ہوگیا؟" 

         محلّے کے ایک دیڑھ شیانے جوان نے زور سے کہنا شروع کیا. 

         "ارے چاچا! ہم لوگ یہاں قریب ہی کھڑے تھے کہ پُنّے چاچا دوڑتے ہوئے آئے. وہ آسمان پر نہ جانے کیا ڈھونڈ رہے تھے کہ ہمارے چِلّانے اور بتانے کے باوجود بھی یہ اس گڑھے میں اوندھے منہ گرپڑے وہ تو اچھا ہوا کہ ان کو چوٹیں نہیں آئیں...... مگر پُنّے چاچا تم آسمان میں کیا دیکھ رہے تھے؟"

         مجھ پر تو ہنسی کا دورہ ہی پڑگیا. پُنّے کو دیکھتے ہوئے میں نے بیساختہ بول پڑا. 

         "اٹھائیس کا چاند دیکھ رہے تھے جناب!" 

         "اٹھائیس کا چاند؟"

         "مطلب؟" 

         "ارے؟"

         "یہ کیا بات ہوئی؟"

           الگ الگ آوازیں ایک حیرت کا اظہار بن گئیں. 

         میں نے ہنستے ہنستے مختصراً تفصیل بتادی.......لوگوں کے قہقہے اٹھائیس کے چاند کو ان کی چاندنی بیگم کے حوالے کرنے کے بعد بھی جاری رہے. چاندنی بیگم نے پُنّے میاں کو دیکھا تو اپنا سر پیٹ کر رہ گئیں......... وہ تو اچھا ہوا کہ میں اس گڑھے سے طلوع نہیں ہوا ورنہ میری بیگم تو اپنے سر کی بجائے مجھے ہی پیٹ کر رکھ دیتی.

      شفیق کے اس جملے پر سبھوں کے ساتھ ساتھ خود پُنّے میاں بھی ہنس پڑے. (ختمۂ جاریہ)

طاہرستان پر تشریف آوری کے لیے شکریہ! آپ کی رائے اہمیت کی حامل ہوگی

Thank you very much for visiting *TAHIRISTAAN*. Visit again.

افسانہ: اپنے حصے کا نخلستان

اپنے حصے کا نخـــلســــــتان 

طاہر انجم صدیقی (مالیگاؤں)

گوری رنگت والا بچہ اور اس کا بابا نہ جانے کب سے اپنے ہی سایوں کو روند رہے تھے۔ان کے سائے دھیرے دھیرے بڑھتے جا رہے تھے۔ اُس گول مٹول سے بچے نے اپنی آنکھوں کے کٹوروں کو بالکل ہی چھوٹا کرلیا اورریگستان کے سینے پرحدِ نگاہ تک پھیلتی چلی جانے والی دھوپ کو دیکھتے ہوئے کہا۔

’’کتنی تیز دھوپ ہے بابا!؟‘‘

’’ہاں بیٹا! بہت تیز ہے مگر اپنے حصّے کا نخلستان ڈھوندنا تو پڑے گا ۔۔۔۔۔‘‘

باپ نے اپنے سر پر لپٹے کپڑے کے ایک سرے سے پہلے بچے کے چہرے پر امڈ آنے والی ڈھیر ساری پسینے کی بوندوں کو صاف کیا پھر اپنا چہرہ بھی پونچھ لیا۔ پسینے کے ساتھ ریت کے باریک باریک ذرات اس کپڑے سے لپٹے چلے آئے۔ 

باپ نے اپنے بیٹے کے سر پر شفقت سے ہاتھ پھیرتے ہوئے کہا ۔

’’اِدھر آ بیٹا ! ۔۔۔۔میری چھاؤں میں آجا ۔۔۔۔‘‘

گوری رنگت والا چھ سات برس کا معصوم چہرے والا وہ بچّہ اپنے باپ کے سائے میں ہو گیا ۔

’’ہاں بابا! اب دھوپ نہیں لگتی ۔۔۔۔مگر کتنی گرمی ہے  ؟۔۔۔۔اور یہ ہوا اپنے ساتھ کتنی ریت اڑا رہی ہے؟‘‘

بچے نے اپنی پلکوں کے دریچوں کو کھول بند کرتے ہوئے کہا۔

’’ہوں !۔۔۔۔رک بیٹا ذرا!‘‘

وہ دونوں رک گئے۔

باپ نے اپنے سر کا کپڑا کھولا۔اس کے دو ٹکڑے کئے ۔ چھوٹا ٹکڑا بچے کے سر اور چہرے پر اس طرح لپیٹا کہ صرف اس کی آنکھوں کے کٹورے ہی کھلے رہ گئے۔

’’لے بیٹا! میری انگلی پکڑ کر چل ۔‘‘

دونوں ریگستان کی سلگتی ریت پرچلتے رہے۔

ہوا کے گرم تھپیڑے ان سے ٹکراتے رہے۔

ریت کے ذراّت اڑتے رہے. 

ان کے بالوں اور کپڑوں سے الجھتے رہے. 

پلکیں بند کر لینے کے باوجود بھی ان کی آنکھوں کو پریشان کرتے رہے ۔

وہ دونوں اپنے سایوں کے ساتھ ساتھ ریگستان کے سینے کو بھی روندتے رہے. 

اس سفر میں انہیں کئی نخلستان ملے لیکن ان پر دوسرے لوگ قابض تھے ۔

ان کو اپنے حصّے کے نخلستان کی تلاش تھی۔

دھوپ بڑی شدت کی تھی۔

ہوائیں تیز چل رہی تھیں۔

ریت سارے ریگستان میں اپنا وجود پھیلائے ہوئے تھی۔

باپ نے اپنی آنکھوں کو مسلتے ہوئے صحرا کے سکوت کو توڑا۔

’’تجھے معلوم ہے بیٹا !۔۔۔۔ایک مرتبہ میں بھی اپنے بابا کے ساتھ ایسے ہی ریگستان سے گذر رہا تھا۔۔۔۔لیکن اس روز دھوپ تو اِس سے بھی تیز تھی  ۔۔۔۔مگر جیسے میں نے تجھے اپنے سائے میں کیا ہے نا ۔۔۔۔تیرے دادا نے بھی مجھے اپنے سائے میں کر لیا تھا ۔‘‘

’’پھر تو تم کو بھی دھوپ نہیں لگ رہی ہو گی ۔۔۔۔ ہے نا ؟‘‘

بچے کو محسوس ہوا جیسے اس کے بابا کو کوئی نخلستان مل گیا ہو۔ وہ بہت خوش ہوگیا۔

’’ہاں بیٹا! مجھے بھی دھوپ نہیں لگ رہی تھی ۔۔۔۔مگر معلوم ہے پھر کیا ہوا تھا ؟‘‘

’’کیا ہوا تھا بابا؟‘‘

لپیٹے گئے کپڑے سے جھانکتی بچے کی کٹورا آنکھیں سوالیہ نشان بن گئیں۔

’’تیرے دادا آسمان کی طرف چلے گئے تھے ۔‘‘

’’آسمان کی طرف  !!۔۔۔۔وہ کیسے بابا ؟‘‘

بچے کی آنکھوں کے حلقے مزید پھیل گئے۔

اس نے حیرت اور معصومیت سے پوچھا۔

’’رک بیٹا! بتاتا ہوں۔۔۔۔ذرا انگلی چھوڑ تو میری!‘‘

بچے نے دیکھا کہ وہ ابھی تک اپنے بابا کی انگلی تھامے کھڑا تھا۔ 

اس نے جھٹ سے انگلی چھوڑ دی۔

’’۔۔۔۔دیکھ بیٹا! ۔۔۔۔ایسے گئے تھے وہ آسمان کی طرف!‘‘

اس نے اپنے دونوں ہاتھ آسمان کی طرف اٹھا دئیے ۔

بچے نے آسمان کی طرف اٹھے ہوئے اس کے ہاتھوں کو دیکھا۔

بچے پر پڑنے والا بابا کا سایہ غائب ہو گیا. 

اس کے بابا کے پیر دھیرے دھیرے اُپر اٹھنے لگے۔

اس کا منہ حیرت سے کھل گیا۔

وہ اپنے بابا کواوپر اٹھتا دیکھتا رہا ۔

دھوپ کی شدّت نے اس کی حیرت کو جھلسایا تو وہ چونک گیا ۔

اس نے اپنے سر اور چہرے پر لپٹے کپڑے کو کھول کر آسمان کی طرف دیکھا۔

اس کابابا اوپر جارہا تھا ۔

’’بابا !۔۔۔۔نیچے آؤ نا! ۔۔۔۔کتنی تیز دھوپ ہے؟‘‘

اس نے اپنے بابا کو واپس بلایا۔

’’۔۔۔۔۔۔۔۔‘‘

’’بابا !۔۔۔۔ بہت تیزدھوپ ہے ۔۔۔۔تم کچھ بولتے کیوں نہیں؟ ۔۔۔۔اوپر کیوں جا رہے ہوبابا؟ ۔۔۔۔نیچے آؤ نا !‘‘

اوپر سے کوئی جواب نہ آیا۔

وہ چلانے لگا۔

’’با با ۔۔۔۔ بابا۔۔۔۔او بابا!۔۔۔۔نیچے آؤ نا بابا!۔۔۔۔نیچے ۔۔۔۔نی۔۔۔۔چے ۔۔۔۔نی ۔۔۔۔نی‘‘

اس کی آنکھوں سے آنسوؤں کی بوندیں نکل کر گالوں سے لڑھکیں اور اس کے گرد آلود کپڑے میں جذب ہوگئیں۔ 

اس نے اوپر دیکھتے دیکھتے اپنے گٹھنے سلگتی ریت پر ٹیک دئیے۔

آنسوؤں کی بہت ساری بوندیں اُس کی آنکھوں سے نکل پڑیں اور اُس نے دہاڑ مار مار کر روتے ہوئے اپنے لب کھولے ۔

’’با با۔۔۔۔نی ۔۔۔۔چے ۔۔۔۔بابا!۔۔۔۔‘‘

مگر نیچے نظر پڑتے ہی اُس کی آواز گلے میں ہی اٹک گئی ۔

نیچے اُس کا بابا ریگستان کی سلگتی ریت پر اپنے ہی سائے پر بے حس و حرکت پڑا تھا ۔

وہ ابھی اپنے بابا کو اِس حالت میں آنسو بھری آنکھوں سے دیکھ ہی رہا تھا کہ کسی نے اُس کے گرد آلود کپڑے کا کنارہ پیچھے کی طرف کھینچا۔

وہ بڑی پھرتی سے پیچھے مُڑا۔

اُس کے پیچھے ایک چھ سات سالہ، کٹورا آنکھوں والا  بچّہ کھڑا تھا.

اس سے پہلے کہ وہ کچھ سمجھتا، کٹورا آنکھوں والے بچے نے معصومانہ انداز میں اُسے دیکھتے ہوئے کہا. 

’’کتنی تیز دھوپ ہے بابا!‘‘

اُس نے گوری رنگت والے اُس بچّے کو دیکھا۔

پھراپنے اطراف حدِّ نگاہ تک پھیلتے چلے گئے گرم ریگستان کو دیکھا اور ایک ٹھنڈی سانس لے کر اٹھ کھڑا ہوا ۔

اس کے منہ سے بیساختہ نکلا۔

’’اِدھر آ بیٹا ! ۔۔۔۔میری چھاؤں میں آجا ۔۔۔۔‘‘

(ختم شد)

اس کو پڑھیں🔽

پنکھڑی اِک گلاب کی سی

افسانہ : باپو کاکا

باپو کاکا

افسانہ نِگار  :    طاہر انجم صدیقی  ( مالیگاؤں) 

    

 ساٹھ پینسٹھ برس کے باپو کاکا میں نام کے علاوہ اور کو ئی عجیب بات نہیں تھی ۔ ’’باپو کاکا‘‘ نام ہی کہاں تھا؟ دو رشتوں کی پہچان تھا ۔ ویسے ان کا اصل نام رام داس تھا مگر ’’اہنسا پارک ‘‘میں رکھوالے کی حیثیت سے تقرری کے بعد وہاں تفریح کے لئے آنے والوں نے انہیں ’’باپو کاکا‘‘بنا دیا تھا ۔

لوگ پارک میں لگے مہاتما گاندھی کے قد آدم مجسمے کو دیکھتے اور پھر انہیں دیکھ کر کہہ اٹھتے ۔’’ارے باپو ۔۔۔۔۔ارے کاکا۔۔۔۔۔تم تو باکل باپو گا ندھی جیسے لگتے ہو ۔۔۔۔۔بالکل باپو لگتے ہو کاکا ۔۔۔۔باپو کاکا۔۔۔‘‘

جب وہ پارک میں آئے تھے تو کرتا پاجامہ پہنے تھے لیکن گاندھی جی کے چاہنے والوں نے انہیں دھوتیاں لا کر دیں اور پہنے پر مجبور کیا ۔ خود کے تئیں لوگوں کے پیار کو دیکھ کر باپوکاکا نے کرتا پاجامہ ترک کر دیا اور بخوشی دھوتی پہننے لگے ۔

دس سال کا طویل عرصہ گزر جانے کے باوجود بھی انہیں اچھی طرح یاد تھا کہ اسلم نام کے ایک نوجوان نے ہی انہیں سب سے پہلے باپو گاندھی کے ہم شکل ہونے کا احساس دلا کر ایک گول فریم کی بغیر نمبر کی عینک انہیں پہننے کو دی تھی کیو نکہ بڑھاپے کے باوجود بھی ان کی بینائی کمزور نہیں ہوئی تھی. دوسرے روز اس کے دوست ارون نے ایک لاٹھی لا کر دی تھی ۔۔۔اور پھر ان دونوں نے مل کر ایک دھوتی بھی خرید کر انہیں دی تھی ۔ ان دوستوں کی تقلید میں دیگر اور بہت سے لوگوں نے بھی انہیں دھوتیاں لا کر دی تھیں ۔ اس طرح ان کے پاس اچھی خاصی تعداد میں دھوتیاں جمع ہو گئیں ۔ تب ہی تو وہ روزانہ صبح اشنان کے بعد دھوتیاں تبدیل کیا کرتے تھے لیکن ۔۔۔اس صبح انہوں نے اشنان نہیں کیا اور نہ ہی دھوتی تبدیل کی۔  

اس روز جب باپو کاکا کی آنکھ کھلی تو صبح کے دھندلکے مشرقی افق پر سنہری تھال چھوڑ کر جا چکے تھے ۔ پارک کی دس سالہ دیکھ ریکھ کے دوران پہلی مرتبہ ان کی آ نکھ اتنی دیر سے کھلی تھی ۔ ورنہ صبح صادق سے پہلے ہی اپنا پیوند زدہ بستر چھوڑ دینا ان کا معمول تھا ۔          وہ موسم کی شدت سے بے پرواہ اپنا بستر چھوڑ کر اٹھ کھڑے ہوتے ۔۔۔دھوتی ٹھیک کرتے ۔۔۔دھوتی کے پلے کو اپنے بائیں کندھے پر ڈالتے ۔۔۔دائیں طرف اڑسا ہوا بٹوا درست کرتے ۔۔۔۔۔سر ہانے لاٹھی او ر عینک کے پاس رکھی ہوئی پیتل کی بالٹی اٹھا کر اپنی جھونپڑی کا دروازہ کھولتے ۔۔۔۔اور سامنے دیکھتے ۔۔۔باہر تھوڑی ہی دوری پر دو فٹ اونچے چبوترے پر کھڑے مہاتما گاندھی کے قدِآدم مجسمے پر ان کی نظریں جاٹھہرتیں ۔۔۔پوسٹ لیمپ کی روشنی میں ماہر مجسمہ ساز کے ہاتھوں قائم کی گئی ابدی مسکراہٹ گاندھی جی کے ہونٹوں پر پھیلی صاف دکھائی دیتی ۔۔۔۔انہیں محسوس ہوتا کہ مجسمے کے ساتھ ہی کوئی ان کے اندر بھی مسکرا رہا ہے ۔۔۔اس کے ہونٹوں پر گاندھی جی کی ابدی مسکراہٹ ہے ۔۔۔وہ دھیرے دھیرے پھیل رہی ہے ۔۔۔۔اور پھیلتے پھیلتے خود ان کے ہونٹوں تک آ گئی ہے ۔۔۔۔باپو کاکا خود بھی مسکرانے لگتے ۔۔۔ان ہونٹوں پر وہی ابدی مسکراہٹ پھیل جاتی مگر اپنی مسکرا ہٹ سے لا علم باپو کاکا اطراف کا جائزہ لیتے ۔۔۔انہیں پارک کی ہر شئے مسکراتی دکھائی دیتی ۔۔۔۔بیل بوٹے ۔۔۔۔درخت ۔۔۔پودے ۔۔۔۔جھاڑجھنکاڑ ۔ دیواریں ۔۔۔زمین اور آسمان۔۔۔ سبھی مسکراتے محسوس ہوتے۔

 اس مسکراتی فضا میں باپو کاکا اپنے ہاتھ میں بالٹی لئے سیدھے پارک کی بورنگ پر چلے جاتے ۔۔۔۔وہاں تین چار بالٹی پانی سے اشنان کرتے ۔۔واپس اپنی جھونپڑی میں جا کر دھوتی تبدیل کرتے ۔۔۔۔اتاری ہوئی گیلی دھوتی باہر لا کر دیوار کے قریب پڑے پتھر پر رکھتے اور پاس ہی نیم کیے درخت کے نیچے آلتی پالتی مار کر پرایا نام کا آسن جما لیتے ۔۔۔ان کا رخ مہا تما گاندھی کے مجسمے کی طرف ہوتا ۔۔۔۔اس دوران ان کی زبان سے گاندھی جی کے بول الفاظ کی صورت میں نکلتے اور سوئی ہوئی چڑیوں کو جگاتے رہتے ۔۔۔ 

 ’’ایشور اللہ تیرو نام ۔۔۔۔۔ایشور اللہ تیرو نام ۔۔۔۔‘‘ 

اس بول کی تکرار کو سن کر بیدار ہونے والی چڑیاں جب دوسری خوابیدہ چڑیوں کو جگانا شروع کرتیں تو نیم کے درخت کے نیچے بیٹھے باپو کاکا اپنی آنکھیں موند لیتے ۔۔اور منہ ہی منہ میں کچھ بدبدانے لگتے اس دوران کبھی کبھی کوئل کی کوک اور کوؤں کی کائیں کائیں بھی ان کے کانوں کے پردوں سے ٹکراتی رہتیں ۔۔۔تھوڑی دیر بعد جب چڑیوں کا خوشگوار شور اپنے شباب پر جا پہنچتا تو سورج چپکے چپکے مشرقی کنارے سے سر اٹھاتا ۔۔۔۔اور دھیرے دھیرے اوپر سرکنے لگتا ۔۔۔جیسے جیسے اجالا پھیلتا چڑیوں کا شور اس میں تحلیل ہوتا جاتا ۔۔۔جب سورج کی نرم گرم شعاعیں با پو کاکا تک پہنچیں تو وہ اپنی آنکھیں کھولتے ۔۔۔ان کی نظریں آہستہ آہستہ اوپر اٹھتیں اور گاندھی جی کے مجسمے پر سے رینگتی ہوئی ان کے چہرے پر جا ٹھہرتی ۔۔۔۔پھر وہاں سے پھسلتی ہوئی مجسمے کے پیروں تک چلی جاتیں۔۔۔۔وہ اٹھتے اور آگے بڑھ کر گاندھی جی کے پیروں کے پاس کی گرد اُٹھا کرآشیر واد کے طور پر بڑے احترام سے اپنے ماتھے پر لگا لیتے اور سیدھے اپنی جھونپڑی میں چلے جاتے.  

اندر جاکر اپنا بستر ایک کنارے رکھتے ۔۔۔۔عینک اپنی آنکھوں پر لگاتے ۔۔۔۔اور لاٹھی اٹھا کر جھونپڑی کے دروازے سے باہر نکلتے ۔۔۔۔پتھر پر رکھی گیلی دھوتی اٹھاتے ۔۔۔دوبارہ بورنگ پر جاتے ۔۔۔دھوتی کو اچھی طرح دھوتے اور سوکھنے کے لئے پھیلا کر پارک کی صاف صفائی میں جٹ جاتے ۔۔۔۔

لیکن اس روز جب ان کی آنکھ کھلی تو سورج طلوع ہو چکا تھا. چڑیوں کا خوشگوار شور کمزور پڑ چکا تھا اور ان کو محسوس ہورہا تھا کہ وہ بھی چڑیوں کے شور ہی کی طرح کمزور ہو چکے ہیں ۔ ان کی آنکھوں کے پپوٹے سوجے ہو ئے تھے ۔۔۔آنکھوں کی سفیدی میں نظر آنے والے لال ڈورے صاف ظاہر کر رہے تھے کہ ان کی نیند پوری نہیں ہوئی ہے ۔۔۔اور واقعی اخیر شب تک انہیں نیند نہیں آئی ہے۔۔۔۔وہ جاگ کر کر وٹیں بدلتے رہے تھے ۔۔۔بے چین رہے تھے ۔۔۔۔انہیں رہ رہ کر احساس ہو رہا تھا کہ ان کے چاروں طرف آ گ ہی آگ ہے ۔۔۔۔آگ میں بہت سارے لوگ جل رہے ہیں۔۔۔چیخ رہے ہیں ۔۔۔وہ آگ دھیرے دھیرے بڑھ رہی ہے ۔۔۔انہیں بھی جلا رہی ہے ۔۔۔ان کی جھونپڑی ۔۔۔۔۔پورا پارک ۔۔۔خود گاندھی جی بھی اس آگ کی لپیٹ میں ہیں۔۔۔۔باپو کاکا گاندھی جی کو بچانا چاہتے ہیں ۔۔۔۔گاندھی جی کی طرف بڑھتے ہیں ۔۔مگر گاندھی جی غائب ہوجاتے ہیں ۔۔۔۔انہیں چبوترہ خالی دکھائی دیتا ہے ۔۔۔جس کے اطراف آگ ہی آگ ہے ۔۔۔۔پورے پارک میں آگ ہے ۔۔۔پارک کے باہر جہاں بھی ان کی نظر جاتی ۔۔۔۔۔آگ ہی آگ نظر آ تی ہے اور دور دور تک گاندھی جی انہیں کہیں بھی دکھائی نہیں دیتے ہیں ۔۔۔۔انہی احساسات میں کروٹیں بدلتے ہوئے ان کی رات گذری تھی ۔۔۔۔

وہ اپنے آپ کو بہت سمجھاتے رہے ۔۔۔دلاسے دیتے رہے ۔۔۔مگر ان کا دل نہ جانے کس مٹی کا بنا ہوا تھا کہ سمجھتا ہی نہیں تھا اور اسے جتنا بھی سمجھتاتے اتنا ہی الجھتا چلا جاتا ۔۔اور الجھتا بھی کیوں نہیں کہ شہر میں برپا ہونے والا فساد اُن کی آنکھوں کے سامنے ہی تو پھوٹا تھا۔ پارک میں اسلم اور ارون کے درمیان کوئی سخت قسم کی بحث جاری تھی باپو کاکا ان دونوں کی زور دار بحث سن ہی رہے تھے کہ دونوں آپس میں گتھم گتھا ہو گئے ۔۔۔۔باپو کاکا انہیں آوازیں دیتے دیتے لپکے مگر ان کے قریب پہنچنے سے پہلے ہی لوگوں نے دونوں کو الگ کر دیا ۔۔۔اور پھر نہ جانے کیا ہوا کہ انہیں الگ کرنے والے لوگ ہی آپس میں الجھ گئے ۔۔۔ہاتھا پائی کا زور چلا اور پھر دیکھتے ہی دیکھتے ہندو مسلم فساد کی شکل اختیار کر گیا ۔

  پارک سے پھوٹنے والے فساد نے درجنوں لاشیں گرا کر ۔۔۔پچاسوں کو زخمی کرکے۔۔۔ سینکڑوں مقامات نذر آتش کرکے پو رے شہر کو آگ اور دھوئیں میں لپیٹ کر رکھ دیا تھا ۔۔۔ ہندوؤں نے مسلمانوں کا اور مسلمانوں نے ہندوؤں کا دل کھول کر جانی و مالی نقصان کر نا جاری رکھا تھا لیکن حساس باپو کاکا بے چینی سے کروٹیں بدل بدل کر رات کے آخر پہر تک جاگ کر بس ذرا ہی دیر سو کر اٹھے تو سورج طلوع ہو چکا تھا ۔انہوں نے اپنی سوجی ہوئی آنکھوں کے پپوٹے دو ایک بار کھول بند کئے اور آہستگی سے اٹھ بیٹھے ۔۔۔ایک سرد آہ بھری اور بالٹی اٹھائے بغیر ہی بڑی نقاہت کے ساتھ جھونپڑی کے دروازے تک آئے۔۔۔دروازہ کھول کر باہر دیکھا اور چونک پڑے کیونکہ سامنے چبوترہ خالی پڑا تھا اور مہاتما گاندھی کا مجسمہ غائب تھا ۔۔۔وہ جلدی جلدی پارک کے گیٹ پر لگے پبلک ٹیلی فون کی طرف لپکے ۔ 

اپنی دھوتی میں اڑسائے بٹوئے سے ایک سکہ نکال کر ریسیوراٹھایا ۔سکہ سوراخ میں ڈالا۔۔۔پولس اسٹیشن کا نمبر ڈائل کیا اور جلدی جلدی مہاتما گاندھی کے مجسمے کے غائب ہونے کی رپورٹ دے کر گیٹ پر ہی پولس کا انتظار کرنے لگے ۔ 

پارک کے چاروں طرف دور نزدیک جگہ جگہ سے دھوئیں کے کالے کالے بادل اوپر اٹھتے صاف دکھائی دے رہے تھے ۔ ان پر افسوس کرتے ہوئے بس تھوڑے ہی دیر گزری تھی کہ کرفیو کی قائم کردہ خاموش فضا میں پولس جیپ کی آواز ابھر کر ان کے کانوں کے پردوں سے ٹکرائی ۔انہوں نے پارک کا گیٹ کھول دیا ۔  جیپ سیدھے پارک میں داخل ہوئی ۔ اس کا انجن خاموش ہو آ اور ایک انسپکٹر کے ساتھ ہی کئی کانسٹیبل نیچے اتر کر ان کی طرف لپکے ۔انسپکٹر نے باپو کاکا کو غور سے دیکھ کر پوچھا ۔

  ’’کون سا پتلا غائب ہوا ہے ؟۔۔۔۔۔‘‘

’’گا ندھی جی کا ساب ۔۔۔۔۔وہ اس چبوترے پر کا."   

باپو کاکا نے خالی چبوترے کی طرف اشارہ کرتے ہوئے کہا ۔ 

’’ابے بڈھے! یہاں شہر کی کنڈیشن خراب ہے اور تجھے مذاق سوجھا ہے۔۔۔۔وہ چبوترے پر تیرا باپ کھڑا ہے کیا ؟ ۔۔۔"

انسپکٹر نے گاندھی کے مجسمے کو دیکھ کر کہا

"کہاں ساب؟ وہ تو خالی ہے"

 انہوں نے حیرت سے چبوترے کو دیکھا. 

’’ابے اندھے ۔۔۔۔مذاق کرتا سالے بڈھے ۔۔۔۔‘‘ 

اتنا کہہ کر انسپکٹر نے ایک زور دار لات باپو کاکا کو دے ماری۔۔۔۔وہ چاروں خانے چت زمین پر گر گئے ۔۔۔۔مگر ان کے گرتے ہی چبوترے کی طرف سے کسی بھاری بھرکم چیز کے گرنے کی آواز پر انسپکٹر نے سر گھما کر دیکھا ۔۔۔۔چبوترے کے نیچے مہاتما گاندھی کا مجسمہ چاروں خانے چت پڑا تھا۔ 

   ختم شُد...

اس کو بھی پڑھیں. 🔽

افسانہ: اپنے حصے کا نخلستان

افسانہ : فریم کے باہر

  فریم کے باہر 

  (طاہر انجم صدیقی) 

 

          باہر ہوائیں شور مچاتی ہوئی پھر رہی تھیں. دھرتی پر اندھیرا پاؤں پسارنے کی کوشش میں تھا. گھنی اور کالی کالی بدلیوں نے آسمان کو ڈھانپ رکھا تھا. ساری فضا گرد و غبار سے اٹی پڑی تھی. ہوائیں شور مچاتی ہوئی ہال کی باہری دیواروں اور کھڑکیوں کے شیشوں سے سر ٹکرا رہی تھیں. ہال کے اندر آویزاں ایک فریم کے شیشے کے اندر سے وہ بائیں طرف دیکھ رہا تھا لیکن فریم کے باہر وہ بڑی تیز آواز سے ہنس رہا تھا ۔ اس کی ہنسی میں ایک عجیب قسم کا زہر سا ملا ہوا تھا ۔ اور وہ زہر خندی کے ساتھ ہنستا جا رہا تھا ۔ایسا لگتا تھا جیسے وہ اپنی ہنسی کےذریعے کسی کا بری طرح مذاق اڑا رہا ہو ۔۔۔۔اُسے اپنی ہنسی سے بری طرح ذلیل کر رہا ہو۔۔۔۔اور اپنے مقابل شخص کو بالکل ہی حقیر سمجھ کر ہنس رہا ہو. 

          اس کی زہر آلود ہنسی مکمل انتقام بن کر ہال میں گونج رہی تھی. 

          وہ ہال بڑا وسیع تھا۔۔۔۔ہال کے اندر ساگوان کی لکڑیوں سے بنی ڈھیر ساری نشستیں قوس کے سے انداز میں سجی ہوئی تھیں ۔۔۔۔ نشستوں کے سامنے ایک میز سی بنائی گئی تھی. ہر میز پر مائک رکھا ہوا. تھا۔۔۔.نشستوں کا قوس جس سمت مڑتا تھا اُدھر ایک اسٹیج سا بنا ہوا تھا ۔۔۔۔اسٹیج پر بڑی خوبصورت اور اونچی نشست بنائی گئی تھی. اس کے سامنے رکھی میز پر بھی ایک مائک موجود تھا. ۔۔۔۔اسٹیج پر کوئی نہیں تھا ۔۔۔۔اور نہ ہی قوس کے سے انداز میں سجائی گئی نشستوں کی قطاروں میں کوئی نظر آ رہا تھا۔

          ایسا لگتا تھا جیسے ان نشستوں ، اسٹیج اور ڈائس پر صرف اور صرف اس زہر خند ہنسی کا ہی قبضہ ہو ۔۔۔۔اور تمام جگہوں سے وہی ہنسی صدائے باز گشت بن کر ہال کی دیواروں سے کھیل رہی ہو. 

          باہر کا شور اور اندھیرا اسی بازگشت کے ساتھ مل کر اندر دندناتے پھرنے کی خاطر دیواروں اور کھڑکیوں کے شیشوں سے سر ٹکراتا پھر رہا تھا. 

        اچانک ہی ہنسی کی آوازوں نے ہال کی دیواروں اور کرسیوں سے ٹکرا ٹکرا کر دم توڑ دیا ۔۔۔۔اور ایک آواز ابھری. 

        ”کیا بات ہے؟۔۔۔۔اتناکیوں ہنس رہے ہو تم اور کس بات پر ہنسے جارہے ہو؟“

        نئی لیکن باوقار آواز نے سوال کیا۔ جواب میں ہنسنے والی آواز نے بولنا شروع کیا.

        ”میں ؟۔۔۔۔میں ہنس رہا ہوں تو صرف اس لئے کہ تم نے میری بہت مخالفت کی ۔۔۔۔ مجھے ہزار روکنا چاہا ۔۔۔۔ میرے راستے میں لاکھ رکاوٹیں ڈالیں ۔۔۔۔مگر دیکھو میں رکا نہیں اور آ ۔۔۔۔"

" نہیں..... میں نے تم کو روکنے کی کبھی کوشش ہی نہیں کی ورنہ تم ماضی کے کسی کونے کھدرے میں ہی رینگ رہے ہوتے..... میں تو بس اپنی راہ چلتا گیا.....میں اپنے وچاروں اور ارادوں پر مضبوطی کے ساتھ قائم رہا...... ورنہ اگر میں تمہارے خلاف چلا ہوتا تو آج تم میرے سامنے کھڑے نہیں ہوتے."

پروقار آواز کے فوراْ بعد ہنسنے والے آواز ہال میں سنائی دینے لگی. 

          "یہ سب صرف باتیں ہی ہیں. یقین جانو کہ اگر میں تمہارے ساتھ چلا نہیں تو کیا ہوا ؟ ۔۔۔۔میں نے اپنی راہیں الگ بنا لیں۔۔۔۔میں نے سفر کب بند کیا تھا؟ ۔۔۔۔دیکھ لو ۔۔۔۔میں زندگی میں اگر تم سے کبھی پیچھے تھا تو اب تمہارے سامنے کھڑا ہوں ۔۔۔۔تمہارے آدرشوں ۔۔۔۔تمہارے اصولوں۔۔۔۔اور تمہارے نظریات کی مٹّی پلید کرتے کرتے میں یہاں تک آ پہنچا ہوں ۔۔۔۔اور تم تو مجھ سے اچھّی طرح واقف ہو چکے ہو کہ میرے نظریات ۔۔۔۔میرے خیالات ۔۔۔۔اور میرے مقاصد نے تمہیں قدم قدم پر صدمہ پہنچایا ہے ۔۔۔۔تمہیں گولی مارنے میں اگر میں خود شامل نہیں تھا تو میرے اس قدم کے پیچھے میرا دماغ اور میرے نظریات ضرور کام کر رہے تھے ۔۔۔۔اور اب بھی کر رہے ہیں۔“

          ہال کے باہر کی تاریکیوں میں اضافہ ہو چکا تھا. ہواؤں نے آندھیوں کا روپ دھارن کرلیا تھا. درخت اپنی جگہوں سے اکھڑ رہے تھے.  فضا مزید غبار آلود ہوچکی تھی. تاریکیوں نے اپنے پاؤں مزید پسار لیے تھے. اور زہر خند لہجے والی آواز ہال میں گونج رہی تھی. 

        "میں تمہیں آج بھی روز مرتا ہوا دیکھتا ہوں کیونکہ اس اسٹیج اور قوس کی ترتیب میں سجی ان نشستوں پر بیٹھنے والے جب یہاں ملتے ہیں تو تمہارے نظریات، تمہارے وچار اور تمہارے مقاصد کی ارتھیاں سجاتے ہیں۔ تمہارے آدرشوں کی قبریں بناتے ہیں اور دھرتی پر میرا تانڈو شروع ہوجاتا ہے. تم یہ سب اپنی آنکھوں سے دیکھتے ہو۔۔۔۔بے بس ۔۔۔۔بے کس۔۔۔۔۔کچھ بھی تو نہیں کرسکتے تم۔۔۔۔کیونکہ تم لاچار اور مجبور ہوچکے ہو۔ بالکل ویسے ہی جیسے کبھی تم نے مجھے لاچار اور بے بس بنا کر رکھ دیا تھا۔۔۔۔۔ہاہاہاہا!“

        زہریلی ہنسی ہال میں گونج ہی رہی تھی کہ پروقار آواز پھر سنائی دی. 

        "کاش! میں ایسا کرجاتا..... میں نے کبھی بھی تم کو بے بس اور مجبور کرنے کی کوشش نہیں کی. میں تو خود طاقت اور غصے کو استعمال کرنے کا مخالف رہا ہوں لیکن آج سوچتا ہوں کہ تمہارے خلاف مجھے دونوں کا استعمال کرلینا چاہئیے تھا. اگر میں واقعی ایسا کر گزرتا تو اس دھرتی کا نقشہ ہی کچھ اور ہوتا."

مگر جواب میں وہی زہرآلود ہنسی پورے ہال میں گونج گونج کر کرسیوں ،پوڈیم اور اسٹیج پر تانڈو کرنے لگی۔

دوسرے فریم میں حرکت پیدا ہوئی ۔۔۔۔اس میں سجی تصویر کے لبوں میں جنبش پیدا ہوئی اور ایک اطمینان بھری آواز ہال میں پھیلتی چلی گئی۔

” میں مجبور نہیں۔۔۔۔

"بیشک تمہارے نظریات نے میری جان لے لی تھی.... میں مر گیا تھا لیکن میرے وچار آج بھی زندہ ہیں. تم کو تو لگا تھا کہ میرا خون بہا کر میرے وچار کا بھی قتل کر دو گے......مگر دیکھ لو آج بھی میرے وچار امر ہیں اور میرے وچار دھارک آج بھی اسی دھرتی پر سانس لے رہے ہیں جس پر میرے سینے سے ابلنے والا خون بہا تھا. 

مجبور تم ہو۔۔۔کیونکہ تم کل بھی ہارے تھے اور آج بھی ہار ہی جاتے ہو۔۔۔۔۔معلوم ہے کیسے؟ ۔۔۔۔ایسے کہ تمہارے نظریات کی حمایت میں اٹھنے والی ہزاروں آوازوں پر میرے آدرشوں کی ایک کمزور سی آواز بھی بھاری پڑجاتی ہے۔۔۔۔۔بالکل اسی طرح جیسے میری آواز نے تمہاری ہنسی کی لاشیں بچھا دی ہیں۔۔۔۔۔دیکھ لو!۔۔۔۔ان نشستوں ۔۔۔۔پوڈیم۔۔۔۔اور اسٹیج کے اطراف تمہارے قہقہے مردہ پڑے ہیں۔“

اس نے ہال میں نظریں دوڑائیں ۔اس کے اپنے قہقہے چاروں طرف مردہ پڑے ہوئے تھے۔

اس نے کمزور سی آواز والے اس نحیف و نزار شخص کو دیکھا ۔وہ دھوتی پہنے ،لاٹھی لئے اپنے فریم میں مسکراتا کھڑا تھا اور اس کی عینک سے باہر جھانکتی آنکھیں اسے دیکھ رہی تھیں۔

اسے محسوس ہوا کہ اس بوڑھے کی نظروں کی چبھن اس کے برداشت سے باہر ہے.

          وہ لپک کر فریم میں واپس گھس گیا اور اس بوڑھے سے نظریں چرانے لگا۔ اس کے فریم میں گھستے ہی ایک چھناکے کی آواز ہال میں گونجی اور فریم کے شیشہ کی کرچیاں ہال کے مخملی فرش پر بکھرتی چلی گئیں. 

          

(ختم شدہ) 

رومانی افسانہ : پنکھڑی اک گلاب کی سی

*پنکھڑی اک گلاب کی سی*

(طاہرانجم صدیقی) 

           ہم لوگ اپنی دوڑتی بھاگتی مصروف زندگیوں سے تھوڑا وقت چرا کر مہینے دو مہینے میں کہیں نہ کہیں تفریح کے لئے نکل جایا کرتے تھے. میں راستوں کے اطراف قدرت کے سجائے گئے حسیں مناظر سے ہمیشہ ہی لطف اندوز ہوا کرتا تھا. پیچھے کی طرف دوڑے بھاگتے درختوں کی قطاریں، ایک چکّر سا کاٹتے ہوئے میدان، کھیت اور وادیاں، لپکتے چلے آنے والے چھوٹے بڑے پہاڑ، کہیں ان پہاڑوں کی چوٹیوں کو جھک کر چومتے سفید، سرمئی، اجلے اجلے ابر کے ٹکڑے اور ان کی بلائیں لے کر گزر جانے والی سیاہ بدلیاں، زمین کی محبت میں پہاڑوں سے اترتے چلے آنے والے جھرنے، لہراتی بل کھاتی ندیاں، ٹکٹکی باندھے آسمان کو تکے چلی جانے والی جھیلیں مجھے ہمیشہ ہی بڑی بھلی لگتی تھیں. البتہ جب کہیں چٹیل میدانوں یا ریگستانوں کے آس پاس سے گزر ہوتا تو مجھے محسوس ہوتا کہ میں ان سے ناواقف نہیں ہوں. مگر اس مرتبہ ایسا نہیں ہوا. میں ہل اسٹیشن پہنچنے تک اپنے موبائل پر مسلسل پڑھتا رہا. میرے دوست شکایت کرتے رہ گئے مگر میں نے ہل اسٹیشن پہنچنے کے بعد کتاب ختم کرکے ہی موبائل کو جیب میں رکھا.

          ہم لوگ گاڑی سے اتر کر اپنے جانے پہچانے مقام کی طرف بڑھے. وہاں قدرت نے چاروں طرف ہریالی بچھا رکھی تھی. ہواؤں کے تسلسل اور ان میں شامل ٹھنڈک زمین سےآٹھ نو سو فٹ اوپر اٹھ آنے کا خوش کن احساس پیدا کررہی تھی. موت کی سی خاموش گہری کھائی سے لوگوں کو بچانے کے لئے دور تک لوہے کا مضبوط جنگلہ لگایا گیا تھا. جنگلے سے دس پندرہ فٹ آگے بانس کی کھپچیوں اور بَلّیوں پر پلاسٹک کا سائبان تان کر چھوٹی چھوٹی دوکانیں بنائی گئی تھیں. ان دوکانوں کے مالک آنے والوں کو آوازیں دے کر اپنی طرف بلا رہے تھے. 

          "بولو بھائی چائے...... ہاں میڈم ناشتہ......" 

          "گرما گرم بھُٹا لے لو بھئی بھُٹّا!" 

          "بولو سر! گرین ٹی..... کولڈرنک...... آئسکریم....." 

           ہم دوستوں کے قدم بغیر کسی آواز کے اس دوکان کی طرف بڑھ گئے جس کے سامنے وہ کھڑی ہوئی تھی. سفید لباس اور اس کے گلے میں پڑا ہلکے زعفرانی رنگ کا دوپٹہ اسے بن سنور کر آنے والی دوسری لڑکیوں سے ممتاز کررہا تھا. وہ اپنی فیملی کے ساتھ ایک سفید گھوڑے کے پاس کھڑی تھی. اسے دیکھتے دیکھتے میرے ذہن میں ایک تکونی سایہ سا لہرا گیا. 

          کسی نے مجھے ٹہوکا سا دیا تو میں چونک اٹھا. 

          "اوئے رامش! کتابی کیڑے! اب کیا اس کا چہرہ بھی پڑھ ڈالے گا؟"

          مجھ سے مخاطب اپنے دوست کو میں نے خالی خالی نظروں سے دیکھا.

          میری آنکھوں میں اس دوشیزہ کے معصوم چہرے کا عکس دھندلا ہی نہیں ہوا تھا. اس کی گوری اور دل کی گہرائیوں کو روشن کر دینے والی رنگت دل کی دیواروں پر آویزاں تھی. ستواں ناک کے نیچے قدرت کے سجائے ہوئے یاقوتی ہونٹ میری آنکھوں میں اب بھی خمار کی صورت موجود تھے. شام کی سرخی کو شرما دینے والے رخساروں کی رنگت اور ان پر اٹھلانے والی ناگن لٹیں میرے دل کو جکڑے چلی جارہی تھیں. کمان ابروؤں تلے لانبی لانبی پلکوں کے سائبان میں بڑی بڑی کٹورا آنکھوں کی سفیدی میں تیرتی سیاہ پتلیاں دل کے تاروں کو مسلسل چھیڑے جا رہی تھیں. اس کا لہجہ کانوں میں رس گھول رہا تھا. اس کی میٹھی آواز دل تک اترتی چلی جارہی تھی، اس کے قہقہوں سے آس پاس جلترنگ بجتے محسوس ہورہے تھے. 

           وہ ایک شہزادی کی طرح دکھائی دے رہی تھی. اس کے ہاتھوں میں گھوڑے کی لگام تھی. گھوڑا باکل کسی غلام کی طرح سر جھکائے کھڑا تھا. گھوڑے کی دم زمین کو چھورہی تھی لیکن اس شہزادی کی پتلی اور نازک کمر کو چھو کر اٹھلاتے ہوئے بَھرے بَھرے کولہوں کو چوم چوم لینے والے بالوں نے ہواؤں سے ساز باز کر رکھی تھی. وہ تھوڑے تھورے وقفے سے اسے اپنی بانہوں میں سمیٹ لینے کو مچل رہے تھے. وہ ایک عجیب سی شان کے ساتھ انھیں سہلاتی ہوئی اپنے شانوں سے پیچھے دھکیل رہی تھی.

           اسے دیکھتے ہوئے مجھے یوں محسوس ہورہا تھا جیسے میں ابھی کچھ کہنے کے لئے لبوں کو جنبش دوں تو میرے الفاظ اشعار میں ڈھل جائیں. اس کے لہراتے بالوں کو دیکھ کر لگتا تھا کہ ہواؤں میں ہاتھ لہرا دوں تو سارے منظر پر جادو سا چھا جائے. اس کے رخساروں کی سرخی سے گمان ہورہا تھا کہ آسمان کی طرف ہاتھ بڑھا دوں تو شام اپنے رنگوں میں میری انگلیاں ڈبو دے. ان رنگوں کو زمین پر جھٹک دوں تو سینکڑوں رنگوں کے پھول کھِل جلائیں.

          پھول میرے دل میں کھل رہے تھے.......ایک..... دو اور سینکڑوں نہیں. ..... بلکہ انگنت پھول...... ان میں سے کچھ پھولوں کی پنکھڑیوں میں اس کے ہونٹ لرز رہے تھے. کچھ پھول اس کے سرخ رخساروں کی حیا سے شرما رہے تھے. کسی پھول میں اس کی آنکھوں کی سفیدی کِھلی ہوئی تھی. کسی پھول میں اس کی پرکشش رنگت مچل رہی تھی اور کسی کسی پھول سے وہ جھانکتی ہوئی سی محسوس ہورہی تھی. ان پھولوں کی جداگانہ خوشبوؤں کی لپٹیں اُٹھ اُٹھ کر فضا میں گھلی چلی جارہی تھیں. 

          وہ میری سانسوں میں عطر عطر سا اترتی چلی جا رہی تھی. میری روح تک اس کی خوشبو سے سرشار ہو چکی تھی. وہ میری نس نس میں اٹھلاتی پھر رہی تھی. میں محسوس کر رہا تھا کہ وہ میرے روئیں روئیں سے جھانک کر مجھے دیکھ رہی تھی. اس کے ہونٹ لرز رہے تھے. اس کے رخساروں کی سرخی مزید بڑھ رہی تھی. شرم سے جھک جانے والی لانبی لانبی پلکیں اس کی کٹورا آنکھوں کی پتلیوں پر عارضی نقاب ڈال رہی تھیں. میں مبہوت سا اسے تکے چلا جارہا تھا. میں بہت مسرور تھا. سرشار تھا. معطر تھا. وہ بھی شادماں دکھائی دے رہی تھی. ایسا محسوس ہو رہا تھا جیسے وہ میری کیفیت سے لطف اندوز ہورہی ہو.

          وہ مجھے دیکھ رہی تھی. مسکرا رہی تھی. میرے ذہن میں ریت کے ذرات سے اٹی فضا واضح ہورہی تھی...... تکونی سائے ریت کے ذرات کا پردہ سرکا کر جھانکنے کا جتن کررہے تھے......آگ کی لَپٹیں لہرا رہی تھیں.

          میں اس سے کچھ بولنا چاہتا تھا مگر بولنے سے پہلے اس کی آواز کا جادو میری زبان گنگ کئے جارہا تھا. میں چاہتا تھا کہ اس کی طرف قدم بڑھاؤں مگر اس کے حسن کا طلسم میرے پیروں کو جکڑے ہوئے تھا. میں اٹھنا چاہتا تھا لیکن اس کے وجود کا قرب میرے اعصاب پر قابض تھا. میں اسے دیکھے جا رہا تھا. وہ پھولوں سے جھانکتی اپنی کٹورا آنکھوں سے آنکھ مچولی کھیل رہی تھی. اس کی ہنسی کا جلترنگ میرے کانوں سے دل تک اترتا چلا جارہا تھا.......اور پھر اسی جلترنگ میں مدھم مدھم سی بھنبھناہٹ شامل ہوگئی......چاروں طرف سے وہی بھنبھناہٹ ابھرتی سی محسوس ہوئی.......اور لکڑیوں کے چٹخنے کی آوازیں واضح طور پر سنائی دینے لگیں.......ہمارے چاروں طرف انگاروں کے پھول کھل اٹھے. 

          اچانک ہی ان پھولوں میں ہلچل سی ہوئی اور وہ میرے سامنے آکھڑی ہوئی. میری سانسیں رک سی گئیں. اس نے میری طرف ہاتھ بڑھا دیا. میں نے اس کے ہاتھ کو دیکھا. مجھے ایسا محسوس ہوا جیسے روشنی کا ایک ہالہ سا میری طرف بڑھا ہوا ہے. اس کی ہتھیلی پر چاندنی سی روشن روشن کوئی چیز کھِلی ہوئی ہے. 

          اس نے مٹھی بند کرلی. میرے وجود میں کوئی چیز بجھ سی گئی. میں تڑپ اٹھا. میں پہلو بدل ہی رہا تھا کہ اس نے اپنے یاقوتی لبوں کو جنبش دی. 

          "آپ کہاں گم ہیں شہزادہ خامون! کچھ فرمائیں کہ جان میں جان آئے."

          اس کے ہونٹوں سے پھول جھڑنے لگے. 

           اس کی آواز کے ساتھ ہی ایک عجیب قسم کی ٹھنڈک میرے کانوں سے ہوتی ہوئی دل تک پہنچنے لگی. میرے اندر کچھ اضطراب سا مچ گیا. مجھے اپنے اندر بڑی گہرائیوں سے کچھ آوازوں کا ایک کَوندا سا لپکتا محسوس ہونے لگا. میرے وجود نے مجھ سے سرگوشی کی.

          "اینیکسی......." 

          اس نام کی مٹھاس میری روح کی گہرائیوں تک پھیلتی چلی گئی. 

          "اینیکسی" 

          میرا وجود اس نام سے سرشار ہو کر مچل اٹھا. میرے زبان سے بے ساختہ نکلا. 

          "اینیکسی...... میری اینیکسی.......میری روح کی گہرائیوں پر قابض اینیکسی! اب تک تم کہاں تھیں؟....... بھلا کوئی روح اپنے جسم کو چھوڑ کر یوں رخصت ہوتی ہے جیسے تم وداع ہوئی تھیں؟ .......  میں نے تم کو کہاں نہیں تلاش کیا؟....... مصر کے سارے اہراموں میں تمہارے کے لئے بھٹکتا رہا....نیل کی گہرائیوں نے میرے منہ سے نکلی تمہارے نام کی پکار سنی...... فرات کے کناروں نے مجھے تمہارے عشق میں دیوانہ وار ادھر ادھر بھاگتے ہوئے دیکھا.......میرے تلوؤں نے تمہاری ایک جھلک کے لئے ریگستانوں کی پیاس بجھا ڈالی..... بابل اور نینوا کی وادیوں کا چپہ چپہ میرے ساتھ مل کر اینیکسی اینیکسی پکارتا رہا...... مگر تم ......تم کو نہ ملنا تھا......نہ ملیں......ہم دونوں کو تو ایک ساتھ حنوط کیا گیا تھا.......ہم نے ایک دوسرے کا ہاتھ پکڑرکھا تھا. ہم دونوں کا دوسرا ہاتھ ایک دوسرے کی کمر پر تھا. ہم ایک ہی تابوت میں تھے.. .....ہمارے جسم بھلے دو رہے ہوں.... مگر ہماری روحیں زمین اور آسمان کے کناروں کی طرح ملی ہوئی تھیں.........اس تابوت کو توڑ کر تم کہاں چلی گئیں تھیں اینیکسی.....؟"

          "میرے خامون....... میرے شہزادے...... معاف کرنا مجھے.... دراصل میں آپ کو بے جان ہوتے ہوئے دیکھ نہیں سکتی تھی......میں چاہتی تھی کہ آپ کے قدموں میں اپنی روح بچھا دوں...... اور میں نے وہی کیا بھی...... آپ میری تلاش میں بڑی سرعت سے کہیں نکل چکے تھے....... اس لئے مجھ پر آپ کی نظر نہیں پڑ سکی تھی...... اپنی روح کو آپ کے قدموں میں بچھا دینے والا وہ لمحہ بے انتہا مسرور کن تھا. میری روح عجیب قسم کی لذتوں سے سرشار تھی....... اور جب اس سرور کے درمیان آپ کا خیال آیا تو میں نے دیکھا کہ آپ اپنا جسم چھوڑ کر کہیں رخصت ہو چکے تھے....... اس کے بعد میں خود بھی تو آپ کے لئے دیوانہ وار ادھر ادھر بھٹکتی رہی ہوں..... میں نے بھی آپ کے لئے بہت سارے ملکوں کی سرحدوں کو روندا ہے.......آپ کو کیا لگتا ہے...... آپ کی اینیکسی آپ کے بغیر رہ سکتی ہے شہزادہ خامون؟..... میں نے تو آپ کے لئے اپنا محل...... عیش و آرام..... سب کچھ چھوڑ دیا تھا...... تخت و تاج کو ٹھوکر میں اڑا دیا تھا..... آپ کے بغیر جی لینا کیا مجھ کو زیب دیتا؟ اس وقت جب ہماری روحوں کے اطراف کا ماحول گلنار تھا. میں آپ کے قدموں کی خاک کو اپنے ماتھے پر سجا رہی تھی."

          میں نے دیکھا. اینیکسی کی آنکھوں سے دو موتی نیچے ڈھلک آئے. وہ جیسے ہی زمین پر گرے زمین نے سسکاری سی بھری اور ان آنسوؤں کی جگہ دو پودوں کو سجا دیا. ان پودوں میں اینکسی کی آنکھوں کی شباہت کی دو پتیاں کھِل کر مجھے دیکھنے لگیں.

          میں تڑپ اٹھا. میرے اندر ایک ہلچل سی مچ گئی. میں اٹھ کھڑا ہوا. میں نے دونوں ہاتھوں سے اپنی اینیکسی کا ہاتھ تھام لیا. صدیوں بعد اینیکسی کا لمس پاکر مجھے یوں محسوس ہوا جیسے میرے ہاتھوں میں روئی کا گالہ اور چاند کا ہالہ سا آگیا ہو. ایک عجیب سی لہر میرے ہاتھوں سے گزری اور ذہن و دل پر چھا گئی. 

          میں نے اس کی آنکھوں میں جھانک کر دیکھا. مزید دو موتی ڈھلکنے کو بیتاب تھے. میں نے ٹھنڈی سانس لی. انگلی کی پور سے ان آنسوؤں کو پونچھا. 

          "جانِ حیات اینیکسی! روتی کیوں ہو تم؟ دیکھو! قدرت نے ہمیں ملا ہی دیا ہے نا....."

          میری انگلی کا پور پہلے کافور سا ٹھنڈا ہوا اور پھر گرم ہونے لگا. گرم ہوتا گیا اور کسی انگارے کی مانند جلنے لگا. ہمارے تابوت کے چاروں طرف انگارے دہکتے رہے. لکڑیاں چٹخ چٹخ کر ہماری محبت کی گواہی دیتی رہیں. تکونی سایہ ہمیں گھیرے کھڑے لوگوں کی بھنبھناہٹ سنتا رہا. میں نے اپنی اینیکسی کو دیکھا. اس کی کٹورا آنکھوں میں پیار کا سمندر امڈا آیا تھا. اس نے مچل کر مجھے پوری قوت سے جکڑ لیا...... چاروں طرف دہکتے انگاروں پر اینیکسی کی سانسوں کی گرمی غالب آگئی. 

          "اینیکسی..... میری جان اینیکسی..."

          میں نے اسے سینے سے جکڑ لینے میں اپنی پوری قوت سی صرف کردی. میں اسے شاہانہ ظلم سے محفوظ رکھنے کے لئے اپنے اندر ہی کہیں چھپا لینا چاہتا تھا..... وہ بھی میرے وجود میں مدغم ہو جانے کو بیتاب تھی....... اسی بیتابی میں اس نے میری ہتھیلی پر کچھ رکھ دیا..... میں نے مٹھی بند کرلی. دہکتے انگاروں کے درمیان میری ہتھیلی ٹھنڈی پڑنے لگی...... ٹھنڈک بڑھتی گئی.... آگ کی لَپٹیں تیز ہوتی گئیں. میرا پورا ہاتھ یخ بستہ ہونے کو تھا. رفتہ رفتہ میرے سارے وجود پر وہی ٹھنڈک غالب آتی چلی گئی. 

          اینیکسی میری بانہوں میں تھی. میری مٹھی بند تھی. ہم دونوں ایک ہی تابوت میں تھے. تابوت کے چاروں طرف انگارے دہک رہے تھے..... خوفو کے اہرام کے تکونی سائے میں جلائی گئی وہ آگ ہماری محبت کی گواہ تھی. ہم دونوں ایک ساتھ پگھل جانے کو بیتاب تھے....... میری برف ہوتی مُٹھّی سارے وجود کو ٹھنڈا کئے دے رہی تھی. 

          اچانک ہی کوئی میری مٹھی کھولنے کی کوشش کرنے لگا. 

         " رامش! یہ تو مُٹّھی میں کیا لئے بیٹھا ہے؟ اتنی ٹھنڈی کیوں ہے تیری مٹھی؟......تیرا پورا ہاتھ ہی برف ہورہا ہے! .....مگر رامش! تجھے تو بڑا تیز بخار ہے یار!"

         میں نے خالی خالی نظروں سے بولنے والے کو دیکھا.؟ وہ میرا دوست تھا....... میں نے اینیکسی کو دیکھا...... وہ میری بانہوں میں نہیں تھی..... میرے چاروں طرف ہریالی بچھی ہوئی تھی. اینیکسی گھوڑے کے پاس بھی نہیں تھی. گھوڑا ابھی بھی کسی غلام کی ہی طرح سر جھکائے کھڑا تھا......میں نے بند مٹھی کھولی...... میری ہتھیلی پر چاندنی سی کوئی شئے رکھی ہوئی تھی.....سفید..... خوشبودار......روشن روشن...... ایک پنکھڑی..... گلاب کی سی........

         

                    (ختم شد)